For an English version of this story, please see 8 Nunavik communities affected by smog due to wildfires . ᓄᓇᖃᕐᑐᑦ 8-ᓂ ᓄᓇᕕᒃ ᓄᓇᓕᖏᓐᓂᒃ ᐅᔾᔨᕈᓱᖁᔭᐅᕗᑦ ᓯᓚᖏᑦ ᐱᐅᔪᓐᓃᕐᓯᒪᓂᖏᓐᓂᒃ ᒫᓐᓂ ᓇᐹᖅᑐᓄᑦ ᐃᑭᑲᑕᒃᑐᓄᑦ ᓂᒋᐊᓃᑦᑐᓂᒃ ᓄᓇᓂ. ᓄᓇᕕᒃᒥ ᓄᓇᓕᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᐃᓄᓕᕆᔨᒃᑯᑦ ᑐᓴᒐᒃᓴᓕᐅᓚᐅᕐᑐᑦ ᐋᒐᓯ 15-ᒥ ᑕᒪᑐᒧᖓ.
ᑲᖏᕐᓱᒃ, ᐊᐅᐸᓗᒃ, ᑕᓯᐅᔭᖅ, ᑰᔾᔪᐊᖅ ᐊᒻᒪ ᑲᖏᖅᓱᐊᓗᔾᔪᐊᖅ ᐅᖓᕙ ᓯᒡᔭᖏᓐᓃᑦᑐᑦ ᐊᒻᒪ ᐃᓄᒃᔪᐊᒃ, ᐳᕕᕐᓂᑐᖅ ᐊᒻᒪ ᐊᑯᓕᕕᒃ ᑕᓯᐅᔭᕐᔪᐊᑉ ᓯᒡᔭᖓᓃᑦᑐᑦ ᑕᒪᑐᒧᖓ ᐊᒃᑐᖅᑕᐅᓯᒪᔪᑦ. ᐅᓇ ᑎᑎᕋᖅᑕᐅᑎᓪᓗᒍ, ᐊᕙᑎᓕᕆᔨᒃᑯᑦ ᑲᓇᑕᒥ ᑐᓴᖅᑎᑦᑎᓚᐅᕐᑐᑦ ᓯᓚ ᖃᓄᐃᓕᖓᓂᖓᓂᒃ ᑖᒃᑯᓇᓂ ᓄᓇᓕᖕᓂ ᐊᒃᑐᖅᑕᐅᓯᒪᔪᓂᒃ ᓄᓇᕕᒃᒥ, ᐅᖃᕐᓯᒪᓪᓗᓂ ᐃᓄᖕᓂ ᐊᓃᓗᐊᖁᔨᑲᑕᙱᖢᑎᒃ ᐊᒻᒪᓗ ᐃᓯᕐᓯᒪᑎᓪᓗᒋᑦ ᐃᒐᓛᖏᑦ ᐹᖏᓪᓗ ᒪᑐᔭᐅᓯᒪᖁᔭᐅᓪᓗᑎᒃ. ᐃᓐᓇᐅᓂᕐᓴᐃᑦ, ᓇᒡᔨᔪᑦ ᐊᕐᓇᐃᑦ, ᓱᐴᖅᑐᖃᑦᑕᖅᑐᑦ ᐃᓄᐃᑦ, ᓄᓇᑕᕋᓛᑦ, ᐃᓄᐃᑦ ᓯᓚᒥ ᓴᓇᕙᒃᑐᑦ ᐅᕝᕙᓘᓐᓃᑦ ᐋᓐᓂᐊᖃᐃᓐᓇᔭᒃᑐᑦ ᐊᒃᑐᖅᑕᐅᓗᐊᕐᓂᐊᕋᓱᒋᔭᐅᔪᑦ ᐃᑭᑦᑐᑦ ᐳᔪᖏᓐᓄᑦ.
ᐃᓄᐃᑦ ᐳᔪᕐᒧᑦ ᐊᒃᑐᖅᑕᐅᓗᐊᖅᑐᑦ ᐃᔨᖏᑦᑎᒍ ᐃᒃᐱᒍᓱᓗᐊᖃᑦᑕᕐᑐᑦ ᕿᖓᖏᑦᑎᒍᓪᓘᓐᓃᑦ, ᑰᑲᑕᒃᖢᑎᒃ ᕿᖓᖏᑦ, ᓄᐸᓕᕐᓗᑎᒃ, ᐃᒡᒋᐊᕐᓗᓕᕐᓗᑎᒃ, ᓂᐊᖁᙳᓕᕐᓗᑎᒃ, ᐅᕝᕙᓘᓐᓃᑦ ᐊᓂᖅᑎᕆᑦᑎᐊᕈᓐᓃᔭᓪᓗᑎᒃ, ᖁᐃᕐᓱᑲᑕᒡᓗᑎᒃ, ᐅᐃᔾᔭᙳᑲᑕᒡᓗᑎᒃ, ᐆᒻᒪᑎᖏᑦ ᓈᒻᒪᑲᑕᙱᓪᓗᑎᒃ ᐊᒻᒪ ᓴᒡᕕᖏᑦᑎᒍᑦ ᐋᓐᓂᐊᑲᑕᒡᓗᑎᒃ. ᒫᓐᓇ 28-ᖑᖕᒪᑕ ᐃᑭᑦᑐᑦ ᑯᐸᐃᒃ ᐅᐊᖕᓇᖓᓂ ᐋᒐᓯ 15-ᒥ, ᐊᖏᓛᖅ ᔭᐃᒻᔅ ᐸᐃᒦᖢᓂ, ᐅᖃᓚᐅᕐᑐᑦ ᑯᐸᒃᒥ ᓴᐳᔾᔨᓯᒪᔪᓂ ᐃᑭᑉᐸᓪᓕᐊᔪᓂᒃ ᓇᐹᖅᑐᓂᒃ (SOPFEU). 153 ᐃᑯᐊᓚᓚᐅᕐᒪᑕ ᑕᒫᓂ ᐊᕐᕌᒍᒥ ᐊᒃᑐᐃᓂᖃᖅᖢᓂ 2,308 ᑭᑉᐹᕆᒃᑎᓯᒪᔪᓂᒃ ᑭᓛᒥᑕᓂ ᐃᑭᑦᑐᓂᒃ ᑎᑭᖢᓂ ᐋᒐᓯ 15.
.
